Աղբիւր՝ www.yerakouyn.com
Սիրիոյ Առեւտրի գրասենեակի խորհրդի, Հալէբի Առեւտրի գրասենեակի վարիչ-տնօրէնութեան խորհրդի, ինչպէս նաեւ Արաբ-բելջիքական (եւրոպական) վարիչ-տնօրէնութեան խորհրդի անդամ Լեւոն Զեքի Եդալեանը սիրիական «Ուաթան» օրաթերթի հետ իր ունեցած հարցազրոյցում կոչ ուղղեց Սիրիոյ խորհրդարանին` ընդառաջելու իրաւունքի կոչին, ինչպէս նաեւ գիտակցելով իր ազգային անշեղ սկզբունքներին եւ պատմական կեցւածքներին` ճանաչելու Հայոց ցեղասպանութիւնը, որի հրէշային հանգրւանները գործւել են Թուրքիայի վարչապետ Ռեջեփ Թայիփ Էրդողանի նախահայրերի ձեռամբ, եւ որին զոհ են գնացել մէկուկէս միլիոն հայեր, 20-րդ դարի սկզբում:
Նա անհրաժեշտ նկատեց, որ Սիրիոյ խորհրդարանն անյապաղ ճանաչի Հայոց ցեղասպանութիւնը, որ արդէն իսկ ճանաչւել է Լիբանանի խորհրդարանի կողմից, ինչպէս նաեւ պէտք է մղի, որ Եգիպտոսի խորհրդարանն իր կարգին ճանաչի Հայոց ցեղասպանութիւնը, նկատի ունենալով, որ Եգիպտոսում այս մասին որոշ նշոյլներ են արձանագրւել:
Այստեղ հարկ է նշել, որ սիրիացի ժողովրդի դէմ Էրդողանի գործած արարքները կարելի չէ համեմատել եգիպտացիների հաշւին գործւած թրքական ահաբեկչութեան, ոճիրների, տնտեսութեան եւ ենթակառոյցների քանդումի, ինչպէս նաեւ նրա գործարանների գողութեան հետ:
Եդալեանը նշեց, որ ամերիկեան եւ եւրոպական աւելի քան 20 խորհրդարաններ ճանաչել են Հայոց ցեղասպանութիւնն իբրեւ պատմական իրողութիւն, մինչ թրքական իրերայաջորդ կառավարութիւնները, որոնցից գլխաւորը` Արդարութիւն եւ բարգաւաճում կուսակցութեան կառավարութիւնը, շարունակել են ուրացման քաղաքականութիւնը եւ ժխտել` Հայոց ցեղասպանութեան իրողութիւնը, որ մարդկութեան ճակատին դրոշմւել է:
Նա ընդգծեց, որ թուրք ժողովուրդը բարեկամ է հայ ժողովրդին, նկատի ունենալով, որ նրանք միասին գոյակցել են աւելի քան չորս դար եւ ոչ մէկ արգելք չկայ, որ նրանք դարձեալ հաշտութիւն գոյացնեն, եթէ Թուրքիան ճանաչի իր ջարդարարների ճակատներին ամօթի մի կնիք նկատւող Հայոց ցեղասպանութիւնը:
Եդալեանը մաղթեց, որ Հայոց ցեղասպանութիւնը ճանչաելու բանաձեւը Սիրիոյ խորհրդարանին առաջարկւելու պարագային, սիրիացի երեսփոխանները ճանաչեն այն` իբրեւ պատմական իրաւունք սիրիահայութեան, որ կարեւոր մէկ շերտն է անարդարութիւնն ու սպանդները մերժող սիրիական ընկերութեան:
Եդալեանը դրւատեց սիրիացիների դերակատարութիւնը` հայ ժողովրդին հիւրընկալելու եւ նրա վէրքերն ամոքելու եւ սփոփելու առումով: «Բարձր ենք գնահատում Սիրիոյ պետութեան կողմից հայ ժողովրդի նկատմամբ կեցւածքները, ինչպէս նաեւ հպարտանում ենք սիրիական մեր ինքնութեամբ եւ մեզ սիրելի Սիրիայով: Հաստատում ենք, որ Սիրիոյ հողերից մեզ հեռացնելու թրքական բոլոր փորձերն ու դաւադրութիւնները ձախողելու են, որովհետեւ Սիրիոյ հողերը նաեւ մեր հողերն են եւ մեզ դէմ գործւած բռնագաղթի, ոճիրների եւ վայրագութեան քաղաքականութիւնները յօդս կը ցնդեն»,- շեշտեց նա:
Եդալեանը պահանջեց նաեւ օգտւել թրքական հանրային կարծիքից, թուրք այլախոհներից, որոնք զօրակցում են հայկական իրաւունքներին եւ պահանջում ճանաչել Հայոց ցեղասպանութիւնը, որ գործւել է Ջեմալ փաշայի կողմից, 1915-ին, արաբ ազատականներին ոճիրի ենթարկելու զուգահեռ:
«Անկարելի է այլեւս ընդունել, որ համաշխարհային կարծիքը եւ յատկապէս թրքական հանրային կարծիքը շեղեն իրականութիւնից: Բազմաթիւ թուրք մտաւորականներ մերժում են Հայոց ցեղասպանութեան ուրացման քաղաքականութիւնը եւ կոչ են ուղղում իրենց կառավարութիւններին` փախուստ չտալ իրենց պատմական պատասխանատւութիւնը ստանձնելուց: Ամբողջ աշխարհի խորհրդարանները, որոնց շարքին նաեւ Սիրիոյ խորհրդարանը օրինական բոլոր միջոցառումներին պէտք է դիմեն` ճանաչելու Հայոց ցեղասպանութիւնը եւ ապագային արգելելու նրա կրկնութիւնը»,- եզրափակեց Եդալեանը: